Nagsimula ang lahat sa panunuod ng isang indie film. "Gusto Kita With All My Hypothalamus" ang pamagat.

Tungkol ito kay Aileen, isang babae na ideal girl ng mga lalaking bida sa pelikula. Kasama na dyan si Obeng, isang pipi na magnanakaw sa Recto na lagging inaabangan si Aileen para nakawaan ng gamit. Tinatabi ni Obeng ang mga gamit ng dalaga at kinakabit ito sa isang mannequin. Ini-imagine niya ito si Aileen. Sinasayaw niya sa gabi sa taas ng isang gusali sa Recto. At doon nagsimula ang lahat.

Para sa akin, ito ang kumbulsyon ni Obeng, isang bagay na ginagawa natin na hindi boluntaryo dahil may nararamdaman tayo. Pakiramdam ko maging si Obeng ako.

Sinusulat lahat ng mga nararamdaman. Hanggang sa dumami ang mga tula at mabuo ang koleksyon na ito. At sana, katulad ni Obeng ay may makuha din kayo sa mga tula na ito.